Markmiðið er að draga úr óhollum efnisþáttum í hefðbundnum matvælum og/eða bæta við hollum efnisþáttum í tilbúin matvæli og stuðla þannig að betri heilsu þjóðarinnar.

Hefðbundnum matvælum er breytt þannig að magn neikvæðra þátta t.d. salts, mettaðrar fitu og sykurs minnki og/eða magni jákvæðra þátta eins og omega-3 fitusýra, járns, andoxunarefna aukist án þess að það komi niður á vinnslueiginleikum, neyslugæðum eða kostnaði við framleiðslu á viðkomandi vörum.

Verkefni felast í rannsókna- og þróunarverkefnum, ráðgjöf og fræðslu og eru unnin í samstarf við matvælafyrirtæki, mötuneyti, sveitafélög, samtök, opinberir aðilar og samstarfsaðila í öðrum löndum.

Natríum (salt) hefur áhrif til hækkunar á blóðþrýstingi sem er áhættuþáttur hjarta- og æðasjúkdóma. Talið er að 80% af saltinu sem við neytum komi úr unnum matvælum og er því ljóst að matvælaiðnaðurinn getur á þessu sviði stuðlað að bættri heilsu þjóðarinnar. Margar unnar matvörur eru fitu- og orkuríkar og hlutfall mettaðra fitusýra í fæðunni hefur hækkað en gerð ómettuðu fitunnar hefur einnig breyst. Talið er að hlutur omega-6 fitusýra hafi aukist umtalsvert á kostnað omega-3 fitusýra. Hægt er að bregðast við þessari þróun með því minnka magn harðar fitu eða breyta um hráefni í uppskriftum og breyta fóðrun húsdýra.

Prótein eru ekki bara uppspretta lífnauðsynlegra amínósýra. Rannsóknir á síðustu árum benda til að þau séu einnig mikilvæg í sambandi við stjórn á áhættuþáttum hjarta- og æðasjúkdóma eins og of mikilli líkamsþyngd og of háum blóðþrýstingi. Prótein skipta einnig miklu máli fyrir heilsu og vellíðan eldra fólks svo og í fæði fyrir íþróttafólk.