Haustfundur Rf föstudaginn 23. september

16.9.2005

Haustfundur Rf verður haldinn á Grand hótel Reykjavík föstudaginn 23. september og verður umföllunarefni fundarins einkum um heilnæmi fisks. Þetta er þriðja árið í röð sem Rf heldur slíkan fund og sem fyrr eru allir velkominr á meðan húsrúm leyfir, en fólki er þó vinsamlega beðið um að skrá sig fyrirfram.

Haustfundurinn er að þessu sinni haldinn á 40 ára afmæli setningu laga um rannsóknir í þágu atvinnuveganna (Nr. 64, 21. maí 1965), en með þessum lögum varð Rf formlega til sem sjálfstæð ríkisstofnun, sem heyrir undir sjávarútvegsmálaráðuneytið, eins og í lögunum stendur. Um sérstakan afmælisfund er þó ekki að ræða, þeirra tímamóta verður væntanlega minnst við annað tækifæri, og er nú m.a. unnið að útgáfu sérstaks afmælisrits af því tilefni.

Auk nokkurra fyrirlesara frá Rf munu góðir gestir flytja þar stutt erindi. Ber þar fyrstan að nefna Árna M. Mathiesen, en ávarp hans verður væntanlega eitt af síðustu opinberu verkum hans í embætti sjávarútvegsráðherra. Þá má og nefna Þórólf Árnason, forstjóra Icelandic Group, Katrínu Pétursdóttur, framkvæmdastjóra Lýsi hf, dr. Ingibjörgu Gunnarsdóttir, matvæla- og næringarfræðingur á LSH og Guðbjörgu Glóð Logadóttir, framkvæmdastjóra Fylgifiska.

Lesa dagskrá

Vinsamlega tilkynnið þátttöku í netfangið ingibjorg@rf.is  eða í síma 530 8600




Fréttir