Matís og Landssamband smábátaeigenda halda námskeið um allt land um aflameðferð fyrir smábátasjómenn

18.5.2011

Landssamband smábátaeigenda (LS) og Matís standa fyrir námskeiðum um allt land um bætta aflameðferð. Þar munu sérfræðingar Matís halda fyrirlestra og kynna nýjustu vísindin í meðferð afla, hvernig skal umgangast hann þannig að hæsta verð fáist við sölu hans og neytendur verði ánægðir með gæðin.

Afli smábáta er ferskasta hráefni sem völ er á, en til að tryggja enn betur að fiskvinnslan og neytendur fái sem bestan fisk í hendurnar er mikilvægt að smábátasjómenn þekki vel hvaða þættir hafa helst áhrif á gæðin.

Afli smábáta vegur þungt í heildaraflamagni og aflaverðmæti landsmanna.  Bátar í þessum útgerðaflokki veiddu til dæmis rúmlega 75 þúsund tonn á kvótaárinu 2009/10 að verðmæti 19,1 milljarðar króna og er áætlað að þessi afli hafi skilað um 38 milljörðum króna til þjóðarbúsins í útflutningsverðmætum.

Sökum þess að útgerðamunstur og aðstaða um borð í smábátum er öðruvísi en hjá stærri bátum þá eru helstu áhersluatriði er snúa að aflameðferð sértæk fyrir smábátaflotann.  Af þeim sökum mun Matís ásamt Landssambandi smábátaeigenda standa fyrir námskeiðum víðsvegar um landið þar sem kennd verða ýmiss grundvallaratiði er snúa að aflameðferð.  Námskeiðin verða á eftirtöldum stöðum:

Næstu námskeið:

  • Húsavík – Salur verkalýðsfélaganna (Garðarsbraut 26) – 25. maí kl 20:00
  • Patreksfjörður – Sjóræningjahúsinu – 25. maí kl 20:00
  • Skagaströnd - Kántrýbær - 26. maí kl 20:00
  • Ísafjörður – Hótel Ísafjörður – 26. maí kl 20:00
  • Grindavík – Sjómannastofan Vör – 26. maí kl 20:00
  • Hornafjörður - Nýheimar - 27. maí kl 20:00
  • Egilsstaðir – Hótel Hérað – 30. maí kl 20:00
  • Drangsnes – Malarkaffi – 30. maí kl 20:00
  • Önnur námskeið auglýst síðar 

Námskeiðin eru öllum opin. Ekkert þátttökugjald.
Hvert námskeið tekur u.þ.b. 2 klst.

LS hvetur félagsmenn sína til að nýta sér þetta tækifæri
og auka þannig þekkingu sína á þessu sviði!


Á síðunni, www.alltummat.is/fiskur/smabatar, verða birtar ýmsar upplýsingar um aflameðferð sem eiga sérstak erindi til smábátasjómanna, ásamt því sem birtur verður listi yfir þá sem setið hafa námskeiðin.

Nánari upplýsingar veitir Jónas R. Viðarsson hjá Matís.


Fréttir