Noregur: Úthlutun laxeldisleyfa veldur deilum

29.11.2002

Sú ákvörðun norska sjávarútvegsráðuneytisins fyrr í vikunni að úthluta 50 nýjum leyfum til laxeldis á næsta ári er umdeild. Þeir sem fyrir eru í greininni segja ákvörðunina vera óráð.

Norska sjávarútvegsráðuneytið ákvað á dögunum að veita 50 ný leyfi til laxeldis á næsta ári. Í ár voru gefin út 40 ný leyfi og samtals nema þessar úthlutanir um 12% aukningu á leyfum til laxeldis í Noregi. Slíkum heimildum var síðast úthlutað árið 1988.

Ekki eru allir á eitt sáttir við þessa ákvörðun ráðuneytisins. Norskir laxeldismenn standa nú t.a.m. í erfiðum samningaviðræðum við ESB um lækkun eða niðurfellingu refsitolla sem lagðir voru á þá eftir að þeir urðu uppvísir að því að undirbjóða vöru sína á mörkuðum ESB.

Norskir laxeldismenn óttast að fjölgun leyfa verði til að styggja laxeldisbændur innan ESB, einkum í Skotlandi og á Íralandi og geti þannig torveldað samninga við ESB. Hafa þeir krafist þess að úthlutun leyfanna 50 fyrir árið 2003 verði dregin til baka.


Fréttir