Sjálfvirk þrif í matvælavinnslu

Þróuð verður og markaðssett tækni til sívirkra og sjálfvirkra þrifa í matvælavinnslu, sem er nýjung á alþjóðlega vísu.  Vaxandi kröfur eru frá matvælavinnslum um tækni til sjálfvirkra þrifa, þar sem ávinningurinn yrði:  (i) skemmri tími, (ii) minni mannafli, (iii) bættur og jafnari árangur, (iv) bætt nýting hreinsiefna, vatns og orku, og (v) möguleiki á að þrífa einstök tæki án þess að stöðva aðra hluta vinnslunnar.  Öryggi neytenda eykst og minna af hreinsiefnum fer út í umhverfið.  Í þessu verkefni verður megináhersla lögð á þróun færibanda sem verða sjálfhreinsandi. Framleiðandi tækjabúnaðar mun þróa, framleiða og markaðssetja tæknina; rannsóknafyrirtæki sem mun taka þátt í þróun tækja m.t.t. þrifa og mæla árangur nýrrar þrifatækni og matvælaframleiðandi sem mun veita aðstöðu og hráefni til prófana og taka þátt í þróun sem notandi.

Verkefnið er til tveggja ára, þar sem prófanir og hönnun fyrstu frumgerðar fer fram á fyrra árinu, en endanleg hönnun og ítarlegri lokaprófanir fara fram á því síðara.  Með verkefninu verður brotið blað í þrifum matvælavinnslunnar með samvinnu verkfræðinga og örverufræðinga við að hanna þrifakerfi sérstaklega inn í færibönd.  Við verkefnislok verður þessi nýja tækni markaðssett. 

Starfsmaður

• Viggó Marteinsson
  Fagstjóri
  Sími: 422 5135

Rannsóknarsvið

• Öryggi, umhverfi og erfðir