• Birna & Guðrún í Vietnam

Rf heldur fleiri námskeið í Víetnam

16.1.2004

Í vikunni komu þær Birna Guðbjörnsdóttir og Guðrún Ólafsdóttir, matvælafræðingar á Rf, aftur úr ferðalagi til Víetnam, en þangað fóru þær og héldu þrjú námskeið með háskólafóki í Vietnam og aðilum úr fiskiðnaði. För þeirra er framhald tveggja heimsókna frá Rf til landsins árið 2003.

Þær Birna og Guðrún heimsóttu Víetnam í apríl í fyrra ásamt þeim Sigurjóni Arasyni og Sveini V. Árnasyni frá Rf til að kynna sér aðstæður og funda með heimamönnum. Í kjölfarið var m.a. ákveðið að Rf myndi halda fimm námskeið og að þau yrðu haldin í borginni Nha Trang í suðurhluta Víetnam. Þeir Sigurjón Arason og Sveinn V. Árnason fóru þangað s.l. haust og héldu tvö fyrstu námskeiðin og í byrjun janúar var svo komið að þeim Birnu og Guðrúnu að ljúka þessum áfanga af samstarfi Rf og háskóla í Víetnam, sem felst einkum í að þróa kennsluefni sem tengist vinnslutækni og gæða- og öryggismálum matvæla.

Verkefnið er unnið á vegum DANIDA, sem er þróunarstofnun danska utanríkisráðuneytisins.  Það er hluti af sérstöku átaksverkefni DANIDA í Víetnam er nefnist Seafood Export and Quality Improvement Project (SEAQIP) og miðar m.a. að því aðlaga gæðamál í fiskiðnaði þar að þeim stöðlum sem gilda í ESB.  

Um viðamikið námsefni er að ræða og standa námskeiðin yfir í 2-4 daga, alls 12 daga og fluttir eru á milli 80-100 fyrirlestrar á þeim tíma.  Nú verður námsefnið yfirfarið og lagfært í ljósi þeirrar reynslu sem fengist hefur í Víetnam og síðan munu heimamenn taka alfarið við kennslunni.

 


Fréttir